أرسلت (ب) الى افتح قلبك تقول:
أنا بنت في أوائل العشرينات, اتعرفت على شاب عمره 29 سنه , من حوالي 5 سنين, كان أول حب في حياتي, شفنا بعض مرتين, و بعد كده كلامنا كله كان على النت أو على التليفون لأننا من محافظتين مختلفتين, حبيته بكل ما كان عندي من حب, هو كلامه حلو, و بيكتب شعر, و بيعرف يحسس البنت بنفسها جدا وهي معاه, وده علقني بيه أكتر, لدرجة اني حتى بعد ما بدأت اكتشف عيوبه بعد كده مابقتش قادره ابعد عنه, فهو مادي جدا, يعني من البدايه وهو كان مهتم يعرف كل حاجه عن مرتبي و شغل اهلي و دخلنا الشهري, كمان طول الوقت كان بيطلب مني اني اجيب له هدايا غاليه , واني أنا الي اتصل بيه, وأنا الي أتحمل أي فلوس تندفع في علاقتنا, أنا لاحظت ده لكن تغاضيت عنه, و قلت أي واحد لازم يكون له عيوب.

لكني عرفت بعد كده كمان انه عمل علاقات مع بنات كتير قبل كده, و للأسف كانت علاقات لأبعد الحدود, ولما واجهته اعترف , و قال لي ان ده عادي ممكن يحصل مع شباب كتير قبل الجواز, وبرر لي موقفه ده بان الموضوع ده كان بيحصل بس بدافع الغريزه, مش بدافع الحب أو الاهتمام أو التعلق بواحده معينه, و ده طبعا عذر اقبح من ذنب, لكن برضه حاولت أعديها, وقلت أكيد حاله هاينصلح بعد الجواز.

يوم عيد ميلاده اتصلت بيه و قلت له عايزه اشوفك, قال لي  انه ممكن يؤجر عربيه و ييجي , بس بشرط أنا الي ادفع ايجار العربيه, وكمان أعزمه على الغدا بمناسبة عيد ميلاده, وافقت لأني كنت عايزه اشوفه و ماكنتش هاقدر اسافر له, يومها كنت مبسوطه اوي لما شفته, لكني فوجئت يومها انه بيحاول يلمسني و يقرب مني بشكل زياده عن اللزوم, فرفضت, فزعل و غضب, وسابني و مشي, وبطل يرد على تليفوناتي بعدها.

حاولت اوصل له بأكتر من طريقه, لكن ماكنش بيرد على تليفوناتي أو رسايلي أو ايميلاتي, ففكرت اتصل بواحد صاحبه, فرد عليا و قال لي انا بانصح لوجه الله انك تبعدي عنه , لأنه انسان مش سليم و مايستاهلش واحده زيك, وفعلا بعدت عنه لمدة سنتين, لكن مش عارفه ليه طول الوقت كان في بالي, وكنت بحاول دايما اني اعرف أخباره حتى ولو من على الفيس بوك.

بعد كده جات لي فكره, اني أعمل (أكونت) جديد على الفيس بوك باسم مستعار, و احط صورة بنت حلوه, و استخدم كل المواصفات الي هو بيحبها في البنات, من حيث الشكل, و الماديات, والصفات الشخصيه الي كانت بتعجبه في البنات,وضفته عندي, و بدأت اقنعه فعلا باني غنيه جدا, و والدي مليونير,و و و ….كل الي كان نفسه فيه, اتعلق بيا جدا, لدرجة اني في مره طلبت منه انه يمسح كل البنات الي عنده على الفيس بوك, فعمل كده فعلا, وفضل يحاول مليون مره انه ياخد رقم تليفوني, فكملت اللعبه و اشتريت خط جديد , وكنت باغير صوتي و أكلمه منه, وفضلت أمثل عليه , لغاية ما طلب مني انه يقابل والدي عشان يتقدم لي, طبعا ساعتها مابقتش عارفه أعمل ايه, بقيت فرحانه جدا انه حبني و اتعلق بيا , و بقى عايز يتجوزني, و في نفس الوقت حزينه جدا, لأنه فاكرني واحده تانيه, فكرت اصارحه بالحقيقه لكن خفت من انه يبعد عني من تاني, فقررت أكمل اللعبه.

كدبت عليه و قلت له ان والدي رافض اني أرتبط غير بواحد غني زينا, وان ابن صاحب والدي عايز يخطبني, و اهلي موافقين, فرد عليا و قال لي انه عنده ميراث مش بطال, وعنده شقه, و عربيه جديده موديل السنه دي, وانه مستعد يقابل والدي و يقنعه بأي شكل, المهم اني له, وانه مش هايسيبني اضيع من ايده.

بعد شويه قلت له اني اتخطبت فعلا, وانه خلاص مفيش أمل, اتصدم لما سمع الخبر, وفضل يقول انه برضه مش هايسيبني , واني لازم افسخ الخطوبه دي, وانه لسه مستعد يروح يقابل والدي و اخويا, و يفهمهم انه بيحبني أكتر من اي حد في الدنيا, وانه هايعمل كل الي يقدر عليه عشان يعيشني في نفس مستوايا, وفضل يكلمني فتره و يكرر نفس الكلام, لغاية ما يئس من الوضع, و عرفت بعدها انه خطب واحده تانيه, بنت غنيه برضه, اكبر منه, ومش جميله, اتجننت لما عرفت, كنت غيرانه بشكل جنوني, ازاي بعد كل الحب ده يكون لواحده تانيه؟؟.

فضل يكلمني حتى بعد ماخطب, قال لي ان خطيبته مغروره, ومش طيبه ولا حنينه, وانها قبلت بخطوبته بس عشان هي سنها كبير, لكن هي مش بتحبه ولا حاسه بيه, ولا هو مرتاح معاها.

رجعت بعت له رساله من على ايميلي الحقيقي, و قلت له عايزه اقابلك, فوافق, وطلب مني أني أجيب له معايا فلوس عشان هو محتاج لمبلغ معين اليومين دول, وفعلا اتقابلنا, وبالرغم من كل ده كنت مشتاقه له, و فرحانه اني شايفاه, لكن هو كل الي عمله انه خد مني الفلوس, و سابني بعدها على طول !!!.

روحت يومها مقرره اني أقول لخطيبته على كل حاجه, وفعلا اتصلت بيها على الفيس بوك, و حكيت لها على كل شئ, فلقيتها بترد عليا و بتقول لي انها طول الوقت ماكنتش مطمئنه له, وكانت عارفه انه مادي و بيحب الفلوس, وانه خطبها بس عشان والدها راجل مليونير, وقفلت معاها و هي مقرره انها تسيبه, و فعلا عرفت بعدها ان خطوبتهم اتفسخت,لكن ده بعد ماعرف اني أنا الي قلت لخطيبته على كل حاجه, فاتصل بيا و اتخانق معايا, و قال لي ألفاظ صعبه جدا, وكانت دي آخر مره اتكلمنا فيها.

لكن بعد فتره عرفت انهم رجعوا لبعض تاني, ومش بس كده, لأ دول كمان اتجوزوا بالفعل, بالرغم من انه عارف انها اتجوزته بس عشان سنها كبر, و رغم انها عارفه انه اتجوزها بس عشان فلوسها, المشكله دلوقتي فيا أنا, بجد مش قادره انساه, ولا قادره افكر في حد غيره, دايما باحاول أحسس نفسي بعيوبه, وبانه انسان مش كويس, لكن ده برضه مش بيخليني أكرهه, على طول بتابع اخباره هو و مراته عل الفيس بوك, ومش قادره اعيش حياتي من غير ما أتابع حياته حتى ولو من بعيد لبعيد, تقدري تقولي لي اعمل ايه؟.

والى (ب), اقول:

تعملي ايه في ايه يابنتي؟, تعملي ايه في ايه يا حبيبتي؟, أنا ممكن افهم ان واحد يغش واحده, أو يكدب عليها, أو يخدعها فتحبه و تتعلق بيه وهي مش عارفه حقيقته, لكن تبقي عارفه انه بتاع بنات, وعلاقات غير مشروعه, ومادي, وبياخد منك فلوس عيني عينك كده , و تحبيه؟, ليه ؟, بأمارة ايه؟, قلة رجاله يابنتي؟!!, وهو ده يتسمى راجل من الأساس؟.

تصدقي بالله, لولا انك بعتي لي الرساله دي 3  مرات, أنا كنت افتكرت ان الرساله فيها حاجه غلط, واحد استغلك ماديا, تدفعي له فلوس, و تؤجري له عربيات, و تجيبي له هدايا, وبعدين يستغلك معنويا, و يحاول يتحرش بيكي, وبعدين يقلب عليكي , وهو الي يعمل زعلان_ يا عينه يا جبايره بصراحه_, و بعد ده كله انتي الي تجري وراه, وتحاولي تتصلي بيه؟, لييييييييه؟, بتعملي في نفسك كده ليه؟, تقبليها على نفسك ازاي؟, ليه يا بنات بنرخص نفسنا كده؟.
لأ و الي هايجنني انك بعد ما تبعدي عنه سنتين بحالهم, ترجعي تاني وتتواصلي معاه, وتروحي له برجليكي من جديد, و تكدبي , و تمثلي, و تلعبي عليه, طب هاتستفيدي من ده كله ايه؟, ده حتى لما قال انه حبك وانه عايز يتقدم لك _ وهو طبعا لا حبك و لا غيره_ مقدرتيش ترتبطي بيه زي ما انتي عايزه, لأن الحكايه كدب في كدب, ولعب في لعب, وتخاريف من الأول للآخر!!!.

وياريتها خلصت لحد كده, لأ, تتصلي بيه و تطلبي تقابليه, و كمان تديله فلوس؟, هو ساحرلك ولا حاجه؟….انا عارفه اني يمكن اكون قاسيه عليكي في كلامي, لكن اعذريني أنا مش مصدقه ان في حد ممكن يعمل في نفسه كده, قد كده نفسك هانت عليكي؟, قد كده انتي شايفه نفسك قليله و تستحقي ترتبطي بكائن زي ده؟, صدقيني المشكله مش فيه هو, المشكله فيكي انتي, وفي فهمك للحب و الارتباط, الي زي البني آدم ده للأسف كتير, لكن تفتكري هو ممكن يضحك على اي بنت؟, طبعا لأ, هو بيعرف يختار البنت الي ممكن ينضحك عليها, البنت الي مش حاسه بقيمة نفسها, الي معندهاش أي تقدير لشخصها, الي تقبل انها تدي اي حاجه في مقابل ان حد يحسسها بقيمتها ويفهمها انه بيحبها.
والله العظيم أنا باقولك الكلام ده لأني خايفه عليكي, وعلى كل البنات , وحزينه على اي واحده توصلها عدم ثقتها بنفسها للحد ده, وكل الي أقدر اقولهولك احمدي ربنا اوي ان الموضوع خلص لغاية كده, لأنه كان ممكن جدا يجرجرك لما هو ابعد من كده بكتير, لكن ربنا ستر.

ارجعي لعقلك وفوقي, اعرفي انك ليكي قيمه, وانك حتى لو كنتي مش غنيه أو مش حلوه, فانتي محترمه رغما عن انف الجميع, لأنك بني آدم, و البني آدم ده اغلى و أهم خلق الله,أيا كان وضعه, ومهما بلغت ذنوبه , ومهما كانت اخطائه و حماقاته و عيوبه, انتي انسان له عزة نفس و كرامه وأهميه ,حتى وان كان انسان بسيط.

اعتبري ان علاقتك بالانسان ده كانت سقطه في حياتك, ولازم تخلص و تنتهي الى الأبد, فكري في شغلك, في علاقتك بأهلك, في طموحك, في اي حاجه تقدري تقدميها في الحياه, فكري في انه يكون لك هدف كبير في الدنيا دي,مشكلتك من وجهة نظري هي فراغ عاطفي و معنوي كبير, حبيتي تملأيه بأي شكل, عشان كده شوفي أي حاجه تشغل تفكيرك غير انك تتلصصي على اخبار هذا الشخص كل شويه, أقولك على حاجه, اقفلي الفيس بوك ده شويه كده, واعتبري انه لسه مش موجود في الحياه.

أنا ممكن اقولك كلام يكرهك في البني آدم ده من هنا للصبح _ولو اني مش محتاجه أقول اكتر من الي انتي قولتيه_ لكن أنا شايفه ان مش هو ده الحل, الحل الوحيد هو انك تصحصحي لنفسك, و ترجعي لصوابك, و تحسي أنك اعلى و أغلى وأهم من كده بكتير, بادعيلك من قلبي ان ربنا يزيح عنك الغمه دي, و يهديكي للطريق الصواب, وبكره تفتكري الأيام دي و تضحكي على نفسك و تتعجبي أنا ازاي كنت باعمل في نفسي كده؟.