أرسل (م.م) الى افتح قلبك يقول:

أنا شاب عندي 29 سنه, خطبت قبل كده لكن الموضوع ماتمش, و الحقيقه السبب كان مني, لأني كنت طول الوقت متردد و شاكك في ان خطيبتي تكون هي دي الانسانه المثاليه, شفت بنات كتير بعدها, وكل يوم بقابل بنات كويسين جدا و محترمين جدا, وكمان حلوين, لكن كل ما أقتنع بواحده أرجع تاني أقول, لأ أكيد في أجمل, أكيد في أحسن, لسه مش هي دي الي اكمل معاها عمري كله, وفعلا بترددي ده ضيعت مني بنات كتير كانوا ممتازين للارتباط, لغاية ما ابتديت أقرب من بنت معايا في الشغل, لاحظت اهتمامها هي بيا, وبدأت اتجاوب معاها لكن من غير اي تصريحات, وفضلت متردد في موقفي ناحيتها, عشان كده طول الوقت كنت باتهرب من اسئلتها و بماطل في اني اديها كلمه, لغاية ماهي واجهتني و طلبت مني تحديد موقفي, اما نرتبط أو نبعد نهائيا, و فجأه لقيت نفسي باقول لها اني عايز أرتبط بيها و متمسك بيها, وهي فعلا كويسه ومحترمه و فيها مواصفات اي حد يتمناها, لكن بصراحه مش حاسس اني بحبها, و للمره المليون بلاقي نفسي متردد هي دي؟, لا اكيد في غيرها, اكيد في أحسن, وهكذا.

أنا معجب بيها جدا, لكن خايف اظلمها لما نتخطب وأنا متردد, فأكون شخص بارد غير متجاوب, وفي نفس الوقت انا سني بيكبر ومش معقول هافضل كده, وخايف لو سبتها اضيعها مني زي ما ضيعت ناس كويسين كتير قبلها, انا عموما شخص متردد, لكن في موضوع الارتباط ده متردد فوق الوصف, مش عارف أخد قرار, ممكن حضرتك تساعديني يا دكتوره؟

والى (م) أقول:

أنت شفت فيلم (بلبل حيران ) بتاع احمد حلمي ؟, البطل في الفيلم ده كان طول الوقت حاسس انه (سوبر مان), الراجل الي مافيهوش غلطه, والي يستحق (السوبر سوبر وومان) الي هي صح في كل حاجه, وحلوه في كل حاجه, وبتعرف تعمل كل حاجه, والي هي كل حاجه في اي حاجه, وكانت النتيجه ايه؟, انه فضل حيران بين البنات, ويعمل زي ما أنت بتفكر كده بالضبط, مع دي شويه و بعدين يقول لالالا مش دي, يبقى دي احسن, وبعدين لالالالا اكيد في أحسن, وبعدين يروح لواحده تالته , وبعدين لالالالالالالالالا خالص مش واحده من دول, لغاية ما في الآخر كلهم عفوا يعني ادولوا (بمبه) و سابوه يبكي على الاطلال.

على فكره في شباب كتير اوي بيفكروا بنفس الطريقه, ده حتى في بنات كمان بتعمل كده, تفضل ترفض في عرسان زي الفل, لغاية ما يفوت الأوان و تبقى لا طالت بلح الشام ولا عنب اليمن.

انت عارف فين المشكله الحقيقيه؟, المشكله انك انت نفسك مش عارف انت عايز ايه؟, المواصفات الي بتحبها ايه؟, ايه هي البنت الي تنفع معاك؟, انت عارف لما واحد فينا بيفكر يشتري عربيه, كلنا بنبقى عايزينها احسن ماركه و احدث موديل و ( فول اوبشن), ويا سلام لو تبقى (4*4), لكن كل واحد المفروض يفكر في مواصفات العربيه الي تناسبه هو, عايزها كبيره ولا صغيره, غاليه ولا معقوله, حديثه ولا نصن نص, لأنه مش كلنا يناسبنا كل المواصفات زي بعض, أهو حضرتك كده بالضبط, محتاج تعرف مواصفات البنت الي تناسبك انت, مش الي صح في كل حاجه و حلوه في كل حاجه و المواصفات العامه اللانهائيه دي.

يعني ببساطه كده اقعد مع نفسك و اكتب اهم 10 مواصفات انت عايزها في شريكة حياتك, وخليك محدد قدر المستطاع, يعني مثلا, عايزها بتشتغل ولا لأ, شكلها ايه (بيضاء, سمراء, قمحي, طويله ,قصيره, نحيفه, مليانه) وهكذا, سنها في حدود أد ايه؟, مستواها الاجتماعي ازاي؟, السمات الشخصيه الي انت بتحبها ايه؟ ( دم خفيف, ولا شخصيه جاده, اجتماعيه أوي ولا لأ, شخصيه قويه ولا مش لازم), وهكذا لغاية ما هاتلاقي نفسك عملت زي (كتالوج) للبنت الي انت تحب ترتبط بيها, ودور على البنت دي, لو لقيتها في زميلتك الي في الشغل يبقى خير و بركه, مالقيتهاش يبقى انهي معاها فورا, وركز في انك تدور على الي انت عايزها فعلا.

حاجه تانيه بقى عايزاك تحطها في دماغك, وافتكر انها هاتساعدك في الحد من التردد ده, تأكد انك مش هاتاخد أكتر من نصيبك, وان الي مكتوبالك هاتتجوزها حتى لو شفت بنات الدنيا بحالها بنت بنت, يبقى اهدى كده و ركز, وماحدش بيتجوز زوجة حد.

كمان عايزه اقولك كلمه كده بيني و بينك , أنا و الله مش قصدي حاجه, لكن ماحدش فينا (سوبر) بني آدم عشان يتهيأ له انه هايتجوز واحد مافيهوش عيوب, لازم تكون فاهم و متوقع و متقبل ان الانسانه الي هاتختارها دي لازم هايكون فيها عيوب, ولازم هاتلاقي فيها حاجات مش حلوه, لكن مين مش كده؟, ماتضيعش عمرك بتجري ورا السراب.